Abarayons bakiriye Tchabalala nk’umwami uje kubacungura

Rutahizamu mpuzamahanga w’Umurundi, Shaban Hussein ‘Tchabalala’, yatangaje ko Kiyovu Sports yamwifuzaga ariko ayitera umugongo ahitamo Rayon Sports kuko ari ikipe ikunzwe kurusha izindi kandi izamufasha kwigaragaza cyane anasezeranya abakunzi bayo kuzabashimisha abaha ibyo bamwitezeho.

Abafana ba Rayon sport bamushyize kubitugu mu rwego rwo kumuha ikaze mw'ikipe
Abafana ba Rayon sport bamushyize kubitugu mu rwego rwo kumuha ikaze mw'ikipe

Tchabalala wasinye amasezerano y’amezi atandatu muri Rayon Sports kuri uyu wa Kane avuye mu Amagaju FC, yari amaze iminsi yifuzwa na Kiyovu Sports itozwa na Cassa Mbungo André inayoboye urutonde rwa shampiyona kugeza ubu.

 

Mu butumwa yageneye abakunzi b’iyi kipe, yavuze ko yayihisemo kubera ko abona ifite gahunda zo gukomeza kwitwara neza kandi izamufasha kwigaragaza ku ruhando mpuzamahanga mu mikino ya CAF Champions League izakina ndetse anasezeranya abayihebeye kuzabona ibyishimo abatsindira ibitego.

 

Yagize ati “Biranshimishije cyane kujya muri Rayon Sports. Nzagerageza gukora uko nshoboye ngaragaze ubushobozi bwanjye, nshimishe abafana mfatanye n’abandi bityo tugeze Rayon Sports kure. Nayihisemo kuko ari ikipe ifite guhatana, ikunzwe na benshi, kandi iyo ukinnye muri Rayon Sports ugaragara cyane kurusha ukina muri Kiyovu Sports.”

 

Uyu rutahizamu asanze bagenzi be batatu bakinana mu ikipe y’igihugu y’u Burundi barimo kapiteni wungirije Kwizera Pierrot, Nahimana Shassir ndetse na Bimenyimana Bonfils Caleb ufite ubwenegihugu bw’u Rwanda ariko wakiniye u Burundi.

 

Biteganyijwe ko nyuma yo gusuhuza abafana kuri uyu wa Kane, Tchabalala atangira imyitozo kuri uyu wa Gatanu mu Nzove aho Rayon Sports isanzwe ikorera, agafatanya na bagenzi be gutegura irushanwa ry’igikombe cy’Intwali rigomba gutangira tariki 27 Mutarama kugera ku ya 01 Gashyantare 2018 bazahuriramo na AS Kigali, APR FC na Police FC.

 KAYIGAMBA Theophane

 

(Visited 34 times, 1 visits today)

Leave a Reply

Your email address will not be published. Required fields are marked *