Kayonza: Hasojwe ihuriro ryari rigamije kwigisha abakobwa ku bibazo bahura nabyo harimo n’ihohoterwa ribakorerwa
Abakobwa babarizwa muri porogramu za GLOW harimo abari muri GLOW Clubs (Biga kwikorera ubuvugizi), Healthy GLOW (Biga ubuzima bw’imyororokere), Girl Solve (Biga kwihangira umurimo baturutse mu turere dutandukanye tw’intara y’uburasirazuba basoje ihuriro ry’iminsi itatu ryari rigamije kubigisha amasomo atandukanye ku bibazo bagenda bahura nabyo aho batuye nuko babasha kubyigobotora.
Abakobwa 510 baturutse mu Uturere dutandukanye aritwo Kayonza, Rwamagana na Bugesera binyuze mu biganiro, amasomo ndetse n'imikino bigishijwe ibijyanye n’uburenganzira bwabo n'uko babuharanira biciye mu kwikorera ubuvugizi, biga amasomo ajyanye n’amoko atandukanye y’ihohoterwa, uko babyirinda nuko bamenyesha inzego bireba mu gihe baba hari aho babibonye.
Abakobwa bitabiriye ihuriro “GLOW summit” bigiye kuri bakuru babo basoje amasomo mu myaka ibiri ishize, biciye mw’imurika bakoze ku bikorwa bagiye bakora aho batuye, harimo gusubiza abana bataye ishuri ku mashuri biciye mu buvugizi, ndetse berekana imishinga itandukanye barigukora mu mwaka wa 2022 harimo uwo guhangana n’ihohoterwa rishingiye ku gitsina, kwimakaza uburenganzira bw’umukobwa ndetse no gukora ibikoresho by’isuku y’umukobwa mu gihe cy’imihango.
Henriette ni umugenerwabikorwa wa GLOW witabiriye iri huriro avuga ko hari byinshi yakuye muri iri huriro harimo ibijyanye no kumenya kuvugira mu ruhame, ndetse no gusobanukirwa ko afite uburenganzira bumwe nk’ubwabahungu anasobanukirwa n’amahohoterwa atandukanye yiyongera kuyo yari asanzwe atazi.
Yagize ati: ‘Kugeza ubu nta muntu wapfa kunshuka ngo ampohotere nceceke kuko namaze gusobanukirwa amahohoterwa ntarinzi ndetse menya nuko nakwikorera ubuvugizi biramutse bishatse kuba”.
Umunyamabanga Nshingwabikorwa w’umurenge wa Rwinkwavu Bwana Murekezi Claude aganiriza abakobwa bitabiriye ihuriro “GLOW summit” yabakanguriye kurushaho kumenyana no gushyira hamwe kugira ngo babashe kurwanya ibibazo by’ingutu byugarije uduce batuyemo bakiri bato.
Ready for Reading ni umuryango utegamiye kuri reta ukorera mu murenge wa Rwinkwavu mu karere ka Kayonza ufite ibikorwa bikubiyemo isomero ndetse n’ikigo cy’amaguhurwa, ukaba ubumbatiye ibikorwa bitandukanye birimo na gahunda z’abakobwa babarizwa muri gahunda za GLOW.
Global GLOW ni umuryango mpuzamahanga wita ku wana w’umukobwa umwigisha uko yakwitwara ndetse akaba yagira uruhare runaka mu mpinduka nziza z’aho atuye.
MUKANYANDWI Marie Louise
