Uburezi:AFC/M23 yashyizeho ubuyobozi bushya bwa Kaminuza ya Goma Goma, 30 Gicurasi 2026

Umutwe wa kinyeshyamba ariwo huriro ry’
AFC/M23 watangaje ko wakoze impinduka mu buyobozi bwa Kaminuza ya Goma (UNIGOM), aho washyizeho Prof. Jean Baptiste Kakoma Sakatolo Zambeze ku mwanya w’Umuyobozi Mukuru , asimbuye Prof. Mughanda Muhindo Célestin wari uherutse gukurwa kuri zo nshingano.
Nk’uko bikubiye mu Cyemezo No 032/COORDA-PAJD/BB/AFC-M23 cyo ku wa 29 Gicurasi 2026, cyashyizweho umukono na Bertrand Bisimwa, mbere yo kwemezwa na Corneille Nangaa, izi mpinduka zigamije kuvugurura imikorere n’imiyoborere ya Kaminuza ya Goma.
Uretse Prof. Jean Baptiste Kakoma Sakatolo Zambeze wagizwe Umuyobozi Mukuru, hanashyizweho abandi bayobozi bagize komite nshya ishinzwe kuyobora iyi Kaminuza. Muri bo harimo Prof. Richard Kabuyanga Kabuseba wagizwe Umunyamabanga Mukuru ushinzwe amasomo, Prof. Nzabandora Ndimubanzi ushinzwe ubushakashatsi, ndetse na Butotima Safari wagizwe Umunyamabanga Mukuru ushinzwe ubutegetsi.
Muri izi mpinduka kandi, Paluku Malisawa yagizwe Umuyobozi ushinzwe ingengo y’imari n’icungamutungo, inshingano zifite uruhare runini mu micungire y’umutungo n’iterambere ry’ikigo.
Abasesenguzi bavuga ko izi mpinduka zije mu gihe AFC/M23 ikomeje gushyira imbaraga mu miyoborere y’inzego z’uburezi n’iz’ubuyobozi mu bice igenzura mu Burasirazuba bwa Repubulika Iharanira Demokarasi ya Congo.
Kaminuza ya Goma ni imwe mu mashuri makuru afite uruhare rukomeye mu gutanga uburezi bwo hejuru muri Kivu y’Amajyaruguru, aho yakira abanyeshuri baturuka mu bice bitandukanye by’igihugu.
Mu ngingo ya gatatu y’icyo cyemezo, AFC/M23 yatangaje ko amategeko cyangwa ibyemezo byose byari byafashwe mbere kandi binyuranyije n’iri shyirwaho bisheshwe, kugira ngo ubuyobozi bushya butangire inshingano zabwo mu buryo bwemewe.

Bamwe mu bakurikiranira hafi ibijyanye n’uburezi mu karere bavuga ko ubuyobozi bushya buzaba bufite inshingano zo gukomeza ireme ry’uburezi, guteza imbere ubushakashatsi no guhangana n’ibibazo byagiye bivugwa mu mikorere y’ibigo by’amashuri makuru biri mu bice byugarijwe n’ibibazo by’umutekano.
Ingenzinyayo.com izakomeza kubagezaho amakuru mashya ku mikorere y’ubuyobozi bushya bwa Kaminuza ya Goma n’ingaruka z’izi mpinduka ku rwego rw’uburezi muri aka karere.
Hakizimana Jean Elie